वि.सं. २०७० सालको संविधानसभा सदस्य निर्वाचनमा दोलखाबासीले अत्यधिक मतले बिजयी गराएसंगै मेरो भुमिका संविधासभा सदस्यका रुपमा रह्यो । २०६४ सालमा भएको संविधानसभा निर्वाचनमार्फत गठिन संविधानसभाले संविधान जारी गर्न नसकेपछि, २०७० सालमा भएको निर्वाचनबाट निर्वाचित भएर मैले संविधानसभा सदस्यको रुपमा नेपालको संविधान लेखन र लागु गर्ने हरेक चरणमा आफ्नो योग्यता, क्षमता र विवेक अनुरुपको भुमिका खेलेँ । जहाँ पुरा देश साथै दोलखा र दोलखालीको भावना भन्दा बाहिर गएर मैले कहिल्यै कुनै पनि कदम चालिन । साथसाथै २०७४ सालमा देशभरबाट सर्वाधिक मतान्तर सहित प्रतिनिधिसभा सदस्यमा निर्वाचित भएर संसद् जाँदै गर्दा मेरो मन मस्तिष्कमा विधिको शासन, कानुनी राज्य र आम नागरिकको खुशीका लागि काम गर्ने अठोट थियो । सोही अनुरुप एउटा सांसदको रुपमा नीतिगत भूमिका र पहलहरुमा सिँगो देश र विशेषगरी प्रिय दोलखाली दिदिबहिनी तथा दाजुभाईप्रति जिम्मेवार भएर विभिन्न क्षेत्रको समानुपातिक विकास निर्माणको पहल समेत गरेँ ।